Қазақстанның IT-нарығы рекордтық серпіліс жасап, 2025 жылы 2,9 триллион теңгеге жетті. Деректерді өңдеу, бағдарламалық қамтамасыз етуді әзірлеу және ішкі сұраныстың күрт өсуі саланың негізгі қозғаушы күшіне айналды

Қазақстанның IT-секторы қарқынды дамып келеді. 2025 жылы нарық көлемі 2,9 трлн теңгеге жетіп, 2021 жылмен салыстырғанда алты есеге жуық өсті.

Ішкі сұраныс — нарықтың басты қозғалтқышы: барлық қызметтің 86,7%-ы (2,5 трлн теңге) қазақстандық тапсырыс берушілерге тиесілі. Бұл ретте қарапайым азаматтар тарапынан болған сұраныс бірден 6,3 есеге артқан. Сонымен қатар экспорт та өсіп келеді. Шетелдік клиенттер нарыққа 391,6 млрд теңге табыс әкелді (бір жылда +28,9%).

Елдегі екі басты технологиялық хаб — оңтүстік және солтүстік астаналар. Еліміздегі бүкіл IT-нарықтың 92,2%-ын Алматы (1,8 трлн теңге) мен Астана (883,8 млрд теңге) иемденіп отыр. Өңірлер де қалыс қалар емес: 20 облыстың 16-сында өсім байқалады. Дегенмен, әлі ешқандай өңір 50 млрд теңгелік межені еңсерген жоқ. Ең жоғары өсім қарқынын Ұлытау және Түркістан облыстары көрсетті.

IT-саласы неден табыс тауып отыр? Бірінші кезекте — бұл деректерді өңдеу. Бұл көрсеткіш 10 еседен астам өсіп, 566,6 млрд теңгеге жетті. Сарапшылар мұны жылдың ең қуатты серпілісі деп атайды. Ең ірі дәстүрлі сегмент — бағдарламалық қамтамасыз етуді әзірлеу және тестілеу, бұл бағыт шамамен 762,8 млрд теңгені құрады. Сондай-ақ Big Data аналитикасын қолданатын компаниялар саны да артты (4,2 мыңға дейін). Бұл технологиялар көбінесе сауда, IT/байланыс және құрылыс салаларында белсенді енгізілуде.

Бұдан шығатын түйін — елді цифрландыру толық қарқынмен жүріп жатыр. Қазақстандық бизнес пен халық деректер мен бағдарламалық өнімдерді белсенді түрде қолдануда, ал отандық IT-қызметтерге деген сұраныс ел ішінде де, шетелде де арта түсуде.